勝過鮑參翅肚

我愛吃，如果不是因為要keep fit見人，我肯定是隻暴飲暴食鬼，gym就更加不會做啦！而近日因開始了絕食減磅計劃，一律過甜、過油、過高卡路里食物都要通通滾開，所以在午飯時我都會挑一些較輕便的食物，例如三文治(走牛油)或湯米等.. 要食得輕便，最好就是去茶餐廳，一來選擇多二來夠平，一個三文治加杯熱飲，廿蚊搞掂(凍飲照例加$2)。而我跟同事最常幫襯的茶餐廳就必定是位於九龍城街市頂樓熟食中心的『樂園』！其實熟食中心內還有一檔泰國菜、一檔賣粥賣腸粉、一檔賣粉麵的檔口，儘管食物水準很不錯，但我們依然死硬支持『樂園』！『樂園』的老闆姓陳，為人爽朗熱情，永遠靚仔前靚女後，他記性好，在忙得一團糟的午飯時間也很少會落錯單。陳生的太座叫玲姐，主要是招呼客人同收錢，初見她覺得不太友善，但成為熟客後原來也很體貼。『樂園』生意好除因食物好味外，還要多得蔡瀾推波助瀾，多次在食評中大讚特讚。年前蔡san更提了一幅字畫與『樂園』掛在舖前做生招牌，很耀眼。

以下是我的『樂園滋味推介』，有機會大家不妨試試：
1. 叉燒餐肉煎蛋飯加沙嗲汁 - 叉燒永遠半肥瘦、飯永遠熱辣辣、煎蛋永遠半生熟、餐肉永遠唔燶..
2. 鴛鴦飯 - 其實是粟米肉粒拼豉汁排骨，兩者出奇地夾得埋..
3. 芙蓉蛋飯 - 有成塊面咁大件芙蓉蛋，有好多蝦同叉燒在內，配豉油汁最正..
4. 鮮茄XX飯 - 可配雞、牛、豬扒又或者雞翼。用大量鮮茄去煮，酸酸地甜甜地，好醒胃..
5. 星洲/夏門炒米 - 炒得夠乾身，料足..
6. 楊州炒飯 - 同上..
7. 沙嗲牛肉西多士(新登場) - 沙嗲牛肉做餡，聽起來很怪，但食落很不錯。多士炸得鬆軟，沙嗲牛肉混煉奶同吃，很搞鬼..

唉.. 而家講起都肚餓呢！

蔡san所提的 『勝過鮑參翅肚』

下次要試豆沙西多士
沙嗲牛肉西多士，盛惠$18
很多沙嗲牛肉在內